El festival d’empreses y cultura n’asturianu va celebrase del 11 al 13 d’ochobre en Candás

La Conseyería de Cultura, Política Llingüística y Deporte abre’l periodu de solicitúes pa les empreses que quieran participar nel III Reguerada Fest, que se va celebrar en Candás del 11 al 13 d’ochobre.

Pa poder formar parte del festival, les empreses interesaes tienen que comunicar primero del 15 d’agostu a la Dirección Xeneral d’Acción Cultural y Normalización Llingüística la so disposición a participar y los sos datos al traviés del corréu electrónicu dxpoliticallinguistica@asturias.org. Concretamente, les organizaciones interesaes han indicar nel so mensaxe esta información:

• Nome comercial
• Persona de contactu
• Sector (tipu de productu)
• Teléfonu
• Corréu electrónicu

La Conseyería sigue trabayando na programación d’esta tercer edición del Reguerada Fest, el festival d’empreses qu’utilicen la llingua asturiana y de cultura n’asturianu que rinde homenaxe col nome a Antón de Marirreguera, nacíu nel conceyu de Carreño y autor de la que se considera la primer obra lliteraria conocida n’asturianu. El Festival ufierta a les empreses participantes un puestu pa mostrar a quien visite’l Reguerada los sos productos o servicios.

Al traviés d’esti festival cultural, Candás va convertise otra vez en puntu d’alcuentru de disciplines artístiques variaes y del mundu de la empresa y la comunicación los díes 11, 12 y 13 d’ochobre, con una programación que va tar dirixida a tolos públicos.